Sede:

Ex Pizzigoni - Via Parini, Saronno (VA) 21047

© 2023 by Feed The World. Proudly created with Wix.com

Nòcc de Samòni, Nocc de Demòni

In di campagn del Sevar e della Brianza, tra Sarònn e Còmm, tra Tradàa e Serègn, el girava in di ann indrèe on biroccin caregh de gerli, trainàa da on somarell gris. Ol padròn l’era on omètt piscinin e giald, cont certi barbis bianch e long e tutt vestìi coi abit tradizionai del sò paès, che el doveva vess lontan debon. 
Quand el vedeva in mezz ai campagn on moron, vunn de quei che da semper vegniven piantàa per segnà ol confin tra la terra de on padron e quella de on alter, l’omètt el fermava ol biroccin, el ligava ol somar e taccava a rampegàss in su la pianta, con la gerla voeja in sui spall. Domà rarament el se vuttava cont ona scaletta de legn che el gh’aveva in sul biròcc, perché l’era agil debon, e anca perché i moroni eran vegg e bei sald.  Quand che el vegniva giò la soa gerla l’era piena de quei bozzett bianch indoe che se fann su i bruch prima de diventà farfaij. L’è pròppi quella la materia prima per fà la seda: la sira, quand l’omètt tornava a cà, el metteva in sul feough del sò camin ona pentola piscinina cont ol sò mangià per lu, e ona pussèe granda indoè el metteva a buij i bozzett che l’eva cattàa tutt ol dì. 
El viveva a Guanzàa insemma a tucc i Mangiacoscienza, in d’ona cà bassa e recintada da on mur alt alt, cont ona stalla piscinina in sul de drèe per tegnigh ol biroccin e ol somar. I gent del paès eran content de veggal come visin de cà, perché ol scior Lì l’era pròppi gentil e a tucc el regalava on fazzolett, ona cravatta o on quai alter peciòtt de seda vera per convincei a lassall rampegà in soi sò moroni, e poeu el saludava sempar tucc e l’era bon e de bòna creanza, anca se el parlava pòcch e mal la nòstra lengoa. 
Ma ai fieou, specialment a quei de Guanzàa, el scior Lì el ghe stava minga inscì simpatich come ai sò gent. Intrattant che giogaven al balon in del cortil, el vedevan passà e tornà a cà la sira e ona quai volta ghe andavan adrèe fin a cà soa per vardagh dentar in di finester e capì sa’l faseva. Per lor el podeva benissim vess on stregòn che in dal dì l’andava in gir a cercà i ingredient per ona quai poziòn magica, e la sira el se sarava su in cà a fà on quai malefizzi. De sigur saveven che l’era pròppi lù a regalagh ai sò gent i cravàtt che eren obbligàa a mett su alla domenega per andà a Messa e che i strozzaven ol gargaròzz e ghe faseven mancà ol fiàa tutt ol dì. 
“Ve’l disi mì”, el diseva giamò a metà Magg ai sò amis ol Luisin, ol navot della Perpetua,  “gh’è minga tròpp de fidass de quell lì! Ma l’ha dì anca ol Don Pedar. El va mai in gesa, e el g’ha de vess on stregon o on quai còss del gènar.” E ol Giovannin, che de cà el ghe stava minga tròpp lontan al scior Lì: “Per fòrza, el g’ha de vess on senzadio de sicur, perché tanti volt da cà soa el ven feoura on odor, che mi ho mai sentìi, e se sent on lament, on vosà che el par pròppi quell de ona quai pòra bestia che la soffriss. Mi hoo pensàa al sò somar, ma tucc i dì l’è viv e veget che el tira ol biroccin…” 
“Per mi l’è on servitor del Demòni!”, sentenziava ol Chicco, “I romor che te sentet, Giovann, g’han pròppi de vess i lament dei vittim di sò malefizzi… anzi, per mì l’è on diavol anca lu!” 
I fieou però eren ben lontan dal vess stremìi: “E allora? Se femm?”, domandava ol Martin, “podom minga speccià che el faga ona quai diavoleria e me tira drèe a l’inferna a numm tucc! Bisògna fermall!” 
E inscì, per tutta l’estàa, i quatter amis faseven finta de giogà al balon fin a sira tardi, quand l’omètt el tornava, e peou senza fass vidè ghe correven adrèe. S’eren miss a studià che strada el faseva pussèe de spèss, a vardagh adoss per vidè sa’l faseva. Eren fortunàa che el podeva minga girà cont ol biroccin se l’era scur, sicchè el tornava a cà sempar all’ora che ol Sò andava giò; inscì podeven fà quell mistée senza fà inrebì i sò gent, o fai stà in pensèr. 
On dì che vers i cinqu or l’era taccàa a pieouv e che l’omètt l’era tornà a cà pussèe prest del solit, eren stà bon anca de rampegass anca in sul mur e vardàgh dentar al giardin. L’even veduu mett ol somar in della stalla e voejà ol biròcc, poeu l’era andàa dentar in cà. Dopo on quai minut, eren cominciàa a sentì quei romor che el diseva ol Giovannin, ma even minga veduu da indoe che rivaven, perché ai finestar gh’eren certi tend bleu scur. “Sì content?”, l’ha domandàa ol Giovannin. “Adess almen savìi che mi de ball ne cunti su minga!” 
“Mi t’hòo sempar credùu”, rispondeva ol Chicco, “e anca adess te disi che gh’è de vess pròppi stremì a veggal come visin de cà.” 
Per fà finta de vess minga on tremacoa nanca lù, ol Luisin l’eva dì: “Ier ho provà a fagh vedè ol Crocifiss del Don Pedar, ma lu el m’ha sorris e l’ha dì: <<Bell! Bell!>>, e dopo ma l’ha dàa indrèe e l’è andà via.” Se capiva no se l’eva contà sù ona balla o l’era vera, ma i alter bagaji gh’eren credùu perché el Luisin el ripeteva sempar i paròll del sò Don Pedar: <<Contà sù ona balla el fà caragnà ol Signòr>>. Ma sòtta sòtta, el sperava disend inscì de convinc ol Martin e ol Chicco che quell lì l’era no on demòni de bon, sicché podeven lassà stà quel che cominciaven a vegh in ment. Spià l’omètt andava ben (anca perché al gh’aveva la benediziòn del Don Pedar, che ghe dispiaseva no de savè i affari de l’unich in del paès che l’era minga stà battezzàa…), ma de ris’cià de fass mal o anca on quai còss de pesg, lu el g’aveva pròppi pagura. Sicché ol Luisin l’eva riessì a fa in mòdo de tegnìi bòni fin quasi alla fin de l’estàa, ma anca se in Settembar even cominciàa la scòla e gh’even semper men temp per stagh adrèe al scior Lì, se podeva minga dì che ol Martin e ol Chicco in particolar even cambià idea; on bel dì, pròppi alla fin de Ottober, ol Martin el salta sù: “Evem minga dì che gh’emm de fà on quai còss per quel demòni lì? Adess l’è ol temp giust, se specciom tucc inverna chissà se l’è bòn de tramà cosè!” 
I fieou even capìi che l’omètt, da on quai dì, l’era minga a cà. Sarada sù la pòrta e i finestar e caregà ol biròcc de seda colorada, l’era partìi per andà a Còmm o a Milan, indoe che gh’era on bel mercàa e la gent podeva comprà la soa ròba. L’idea del Chicco l’era de approfittà della soa assenza per entrà dent in della cà e portà via o s’ceppà tucc i ròbb che podeven vessigh necessari per fà i sò malefizzi. Ol Luisin el restava contrari, ma appena l’eva provàa a dill, ol Chicco e ol Martin gh’eren dì che se el voreva el podeva stà a cà, ma dòpo el doveva pùu fass vidè, e che l’era on tremacoa. Sicchè eren partìi dal centar del paès per andà a cà dell’omètt, intant che ol dòpomezzdì l’era gemò diventà sira e che ol Sò l’era drèe andà a dormì come on vegg che el g’ha pressa. “Mi sont no on tremacoa!”, el vosava ol Luisin, intant che ghe correva adrèe ai alter trì. Ol sò vosà l’eva attiràa l’attenziòn del Scior Aldo, cervellèe del paes e zio del Giovannin, che l’era drèe a nettà su cont la scova ol tocchellin de strada de front al sò negòzzi. “Sa sìi drèe fà cosè, malnàtt?”, eva domandàa. “Andìi a cà, ch’el vegn scur!” A rispond ghe toccava al Giovannin: “Preoccupass no, zio, gh’hemm de fà ona ròba, ma fèmm svelta!”  E ol cervellèe, intant che el taccava ammò a scovà: “Stagh attent: nòcc de Samòni, nòcc de Demòni!”. 
Quell dì lì l’era pròppi ol dì de Samòni, quand che gh’è pùu on inizzi e gh’è pùu ona fin, quand tusscoss l’è negar, sospes e anca i mòrt pòden tornà indrèe. Ma quand el parlava de quei ròbb lì, ol cervellèe el gh’eva de stagh attent: se diseva in paès che la nònna della soa nònna l’era ona stria e l’evan brusada in piazza Sant’Eustorgio a Milan. Sicchè, prima de dervì bocca, el s’era vardà ben ben intorna, e quand l’eva vedùu ol Luisin, l’eva pensàa che forsi el saria stà mej fà citto del tutt. 
“Allora, bagaij, femm inscì,” l’era dì ol Martin, intrattant che fasevan strada, “Giovannin, ti te a fagh la scaletta a mi e ol Chicco, che andemm dentar in cà per primm. Quand semm dentar te dervom la pòrta e te vegnet dentar anca ti. E ti, Luisin, gira intorna alla cà per controllà se riva on quai vunn. Come te vedet on quai coss che el se moeuv, vosa fòrt e nunch scappom via.” Rivàa al mur de cinta della cà dell’omètt, i fieou s’eren miss drèe a fà quell che ol Martin l’eva architettàa. Ol Martin, in genoeugg sul murett, el g’ha dà ona man al Chicco a vegnì su anca lu, peou, ona vòlta dentar, l’era andàa a scassinà la pòrta della cà, intant che ol Chicco el derviva quella del cancellett per fà vegnì dentar anca ol Giovannin. In cà, i trì amis even vedùu ol pentolon per fa la seda, pien d’acqua. “Quest chi”, l’eva dì ol Martin, “l’è quell che el dopera per fà i sò pozion magich. Voejemmal!” Ona ruzzadina e –tram!- acqua dappartutt. Peou, in cusina, even trovàa i bogett cont i spezzi e i ingredient che l’omètt el dopprava per dagh gust al mangià, che el s’era portàa drèe fin dal sò Paes, ma che lor even mai vist. “Questi hinn i ingredient de on quai intruj dei sò! Adess ghe i femm sparì!”: i even ciappàa e s’i eren mettuu in saccoccia, per traij dentar in della Lura pussèe tardi e faghei minga doprà. 
In quella, anca ol Luisin l’era entràa dentar in cà. L’eva vist da feoura, dalla porta che ol Giovannin l’eva lassà verta, che la cà dell’omett l’era tutta piena de soramobil, vas, orelogg, e altar ròbb tutt d’ora e de argent. Tutta quella ròba la costava daperlè forsi come tutt ol Paes. L’era ol guadagn de ona vita de sacrifizzi e lavorà dell’omètt; e sotta la spinta de ona curiosità irresistibil, l’era vegnùu dent in cà per  videi mej, rimirai, toccai...
“Luisin! Luisin!”, el ciamava ol Chicco, “Se te set drèe a fa? Movess, che chicchinscì emm finì!” 
“Sont drèe a vardagh addoss a ‘sti belèe”, l’eva rispost ol Luisin, “Perché lassai chi a quel diavol senzadio? Se pensìi cosè, che inn on padelòtt e quatter polverin che g’ha fann fà i sò stregonerìi? No, hinn senz’alter chi òrigh chi, che ghe dann la fòrza! Ma se mi i ciappi e i pòrti in cà del prevet, ol demòni el sarà minga bon de vegnì a toesseij indrèe!”  Anca i alter fieou, dòppo che s’eren fermàa on quai segond a pensagh a sora, hinn stàa d’accord; ol Don Pedar l’avariss sigurament perdonàa la marachella, se i òrigh sarissen stàa sòtta la soa custòdia; sicché tucc insema s’eren miss drèe a ciappai e scondessei sòtta i camis e in di saccòcc dei colzonitt. 
Ona vòlta finìi (ma ghe sarìss stàa de portà via altra ròba), i quatter malnàtt even fà finta de sarà su la pòrta e hinn corùu via pussèe fòrt che podeven, cont ol Luisin che el pareva vegh adess pussèe pressa de tucc. La soa idea l’era quella de andà vers alla gesa, e fass vegnì drèe dai sò amis. Ma intrattant che el faseva strada, on penser el ghe rodeva la ment: “Perché daghel al Don Pedar? Perché podi no tegnì tusscoss par mi? Adess al tegnarissi scondùu sotta ol mè lett, e quand che vegni grand assèe podarissi vendall feoura, comprass on negòzzi e diventà sciòr.” 
A l’ultim moment, l’ha voltà dentar in d’on vicol, e el s’è girà a speccià i sò amis per dagghi ona tappada in cò cont ona statuina d’òr, vun alla volta, per ciappà tutt l’òr per lu. Ma ona vision spaventosa l’ha bloccàa la soa man. In on attim, el Giovannin, ol Martin e ol Chicco eren rivàa anca lor in del vicol, e s’eren trovàa dinnanz una ròba che la pareva ona nigola verda, che la casciava una lus strana, e anca tròn, fulmin sbarlussent e on vent fregg che el faseva vegnì la pell de cappon. Gerà dalla pagura, nissoeun dei quatter amis podeven moeuv on did. Ol romor del vent che el tempestava, a ona certa, el pareva trasformass in d’ona vos, ona vos inrebida, che el Giovannin el cognosseva ben. L’era quella de el sò nònno Franch, che l’era mòrt quand lu l’era ancamò piscinin. El ghe voreva ben debon, e ol Giovannin instess. Ma adess, el pareva vess pròppi feoura di strasc. Anca la nigola la pareva cambià de forma, e adess la gh’era pròppi la faccia del Nonno Franch. In on attim, da part alla soa figura, l’era comparida anca un’oltra, poeu anmò on’oltra, e alla fin anca quella di quatter. Eren quei dei bisnònni del Martin e del Chicco, ma la pussèe inviperida l’era la faccia del Battista, ol nònno del Luisin. Eren tucc e quatter mòrt da on quai ann, ma quella sira, la sira de Samòni, anca i mòrt podeven tornà indrèe. 
Dapprima ogni vos la pareva dì ona ròba diversa, anca se se capiva che i spirit dei Nonni eren minga drèe a fà i compliment ai nevot. Dòpo on pòo, i quatter vòs s’eren giontàa in ona vòs sola, che la diseva: “Gh’ìi no vergògna? Sìi andà a robà in d’ona cà de on òmm che el lavora tutt ol dì, e con che scusa? E ti, Luisin, te vorevet minga coppà i tò amis pròppi adess? Sìi ona vergògna e on’omiliazion per i voster familii! Volentera farann a men de viòlter malnàtt!” In quella, ol vent el se volzava semper pussèe fòrt. On turbin el s’gigottava i nigol, e vun adrèe a l’alter, investiva i quatter bagaji, ghe staccava i pèe da terra e i boffava via lontan, lontan, senza nanca fà sentì ol tremend vosà de pagura che lor eren drèe cascià.
Ancamò al dì d’incoeu, nissoeun el sà indoe che ol Giovannin, ol Chicco, ol Martin e ol Luisin hinn andà a finì: se dis che i Mòrt quella nòcc, i hann menà drèe insema a lor in del sò Reamm, e lor hinn anmò là imprisonàa fin a quand riessirann no a salvagh la pell a on forestée che l’è drèe a lavorà, e a regalagh tutt l’òr del scior Lì.